Participamos nel Rebrot'14 nos Països Catalans.

Los pasaos díes 4, 5 y 6 de xunetu tuviemos participando nel Rebrot 2014, en Sant Celoni (Països Catalans) convidaos por Arrán, organización convocante ya impulsora del eventu. Nestes xornaes pudimos participar en delles actividaes, talleres, charres, manifestaciones y alcuentros onde se faló de soberanía, independencia, socialismu y feminismu dende la perspectiva de la mocedá dels Països Catalans.

Tamién tuviemos ocasión de participar nun alcuentru internacionalista con organizaciones de mocedá independentistes d’otros pueblos del estáu español, como Azarug (Canaries), Yesca (Castiella), Ernai (Euskal Herria), Purna (Aragón), Jaleo (Andalucia), Arrán (Països Catalans) y nós mesmos representando a la mocdá independentista d’Asturies. Nesti alcuentru pudimos sintir de primera mano les realidaes socio-polítiques de la mocedá combativo d’estos pueblos, asina como tamién pudiemos falar y exponer la realidá socio-política d’Asturies en clave de mocedá.

 

Estos alcuentros son ferramientes perútiles p’afitar la solidaridá internacionalista ente los pueblos oprimíos del Estáu Español. Nesti sen, agradecemos el convite y enfotu d’Arrán por haber contao cola nuesa organización pa tar presentes y participar del Rebrot 2014. Dende Darréu vamos siguir apostando poles dinámiques internacionalistes como ferramienta pa combatir ente toes esti sistema enemigu que mos priva de la llibertá.