Paru, precariedá, y emigración: ensin mocedá nun hai futuru

Les últimes estadístiques del INE nun traen bones noticies pa la mocedá asturiano. Los datos tornen a dexar a Asturies como una de les Comunidaes Autónomes que más población perdió nel últimu añu, más de 8.000 persones. D’elles, especifícase que casi la metá tuvieron qu’abandonar Asturies rumbu a otros territorios del estáu, o, mayoritariamente, a otros estaos, a la gueta d’un futuru.

Vamos facer una llaceriosa comparanza ente’l total de población qu’estima l’INE, 1.058.000 habitantes, y el total d’eleutores (persones mayores d’edá) llamaes a votar nes caberes eleiciones europees, casi 991.000 persones. Esta simple comparanza espeya bien claru l’avieyamientu constante d’esti país, que nun ye frutu de nenguna casualidá, mala suerte, o esclusivamente de la crisis estructural del sistema capitalista que se vien sufriendo nos caberos años.

Nesi sen, les mesmes estadístiques del INE amuesen la realidá del tarren llaboral pa la mocedá d’Asturies: un 55% de desemplegu, y una mengua del 17% dende 2008 nos salarios de los y les menores de 25 años, afondando nuna precariedá llaboral qu’apóyase tamién nes estadístiques de contrataciones de cada mes, nes que nun ye raro que más del 90% de los nuevos contratos firmaos seyan de calter temporal y, cómo non, con sueldos bien probetayos, fechu que s’amesta a les más de 8.000 desemplegaes y desemplegaos menores de 25 años.

Cada vegada menos trabayu, y cada vegada más probetayu. Ye la receta que se traduz nes trés pates de la murnia realidá pa la xuventú asturiano: paru, precariedá y emigración.A ello debe amestase’l componente de xéneru (pior situación llaboral nel casu de les muyeres) ya incluso’l de la inmigración, que sigue sufriendo n’Asturies una perimportante esplotación llaboral y persecución, con sistemátiques redaes represives.

Dende Darréu entendemos que toes estes cuestiones nun son frutu de la casualidá, nuna Asturies onde’l problema estructural de la emigración y la falta de futuru llaboral vien siendo una constante dende va décades.

Estes problemátiques nun son más que la consecuencia d’unes polítiques bien definíes, col sellu común del sucursalismu, y feches en función namái de los intereses de les clases dominantes y les sos estructures imperialistes, como España o la Xunión Europea: desmantelamientu industrial, desaniciu de los seutores económicos tradicionales, orientación económica d’Asturies al monocultivu enerxéticu, etc

 Tornamos a afitar nesa llinia que namái podemos poner fin a estes problemátiques lluchando pola emancipación social, nacional, y de xéneru.

-Emancipación social, mediante la construcción del socialismu que garantice un futuru académicu y llaboral afayaízu pa la mocedá. Pa ello, ye imprescindible algamar un estáu asturianu qu’organice la economía baxo’l control y al serviciu de la clase obrera del nuesu país.

-Emancipación nacional, pa finar cola opresión nel tarren cultural, llingüísticu, etc, pero tamién pa frayar d’una vegada col sucursalismu que provoca la puesta d’Asturies al serviciu de los intereses de les clases dominantes del Estáu español, ensin importar pa nada los intereses del Pueblu Trabayador Asturianu.

-Emancipación de xéneru, na llucha escontra’l patriarcáu que, amás de provocar llaceries como los asesinatos machistes, fae que les muyeres, pol fechu de selo, cobren menos nos sos puestos de trabayu, o sufran una mayor esplotación.

En defintiva, dende Darréu insistimos na necesaria llucha soberanista, socialista y antipatriarcal como pilares fundamentales pa que la mocedá asturiano pueda estudiar, trabayar y vivir dignamente nel nuesu país, frente al prietu futuru que nos ufren les élites polítiques y económiques anguaño.

FUTURU P’ASTURIES, FUTURU N’ASTURIES