martes, 23 de septiembre de 2014

Suspéndese la reforma, pero non la llucha



La reforma de la llei l’albuertu foi suspendida, y el ministru Gallardón dimitió. Dende Darréu felicitámonos por esti triunfu na defensa de los drechos de les muyeres, siendo conscientes de qu’estos fechos suponen ganar un batalla, non la guerra.

Nesi sen, como moces, nun escaecemos que’l gobiernu español sigue enfotáu en midides como torgar l’albuertu a los 16 y 17 años ensin consentimientu de los proxenitores, y ello sumao a les opresiones que sufrimos día a día como muyeres, asturianes, moces, y de clas trabayadora.

La llucha namái podrá finar cuando s’acabe col patriarcáu, elementu indispensable pal funcionamientu del sistema capitalista y que sigue calteniendo múltiples opresiones y dominaciones; y como ferramienta qu’afita esi capitalismu y esi patriarcáu, col Estáu español.

Poro, la llucha feminista sigue siendo imprescindible n’Asturies: pa valtiar les amenaces entá esistentes, pa evitar nueves ofensives escontra los drechos algamaos, y pa frayar con organización, movilización y pedagoxía’l patriarcáu y les sos consecuencies na vida diaria de toles moces d’Asturies.

PUXA LA LLUCHA FEMINISTA
ALBUERTU LLIBRE, SEGURU Y DE BALDRE

No hay comentarios:

Publicar un comentario