martes, 26 de mayo de 2015

1808 - 2015: Faciendo alcordanza y #LluchandoPolaSoberanía



Esti llunes tuvo llugar énte la Xunta Xeneral la concentración 1808 - 2015: 207 años #LluchandoPolaSoberanía, col enfotu de facer alcordanza de los fechos de 1808 n'Asturies (llevantamientu popular que provocó la declaración de soberanía de la Xunta Xeneral, creación del exércitu popular asturianu, creación de la bandera asturiana, unvíu d'embaxadores a Inglaterra...) pero tamién de reivindicar la necesidá de la llucha pola soberanía nun contestu como'l d'anguañu, con un pueblu asturianu atáu de pies y manes no tocante a los sos drechos sociales y nacionales.

Nel actu, amás de la llectura del manifiestu convocante, intervinieron trabayadores de subcontrates de Movistar, desplicando la so perimportante llucha, asina como representantes d'Asturies en Pie, que desplicaron la situación esistente n'Asturies en cuantes a represión, con cientos d'años de peticiones de cárcel y una bayura de multes.

Dende Darréu sofitamos esta iniciativa entendiendo que la llucha pola soberanía p’Asturies non solo ye innegociable, sinon que ye imprescindible pa una mocedá afeutada por problemátiques tan importantes como’l paru, la precariedá, la emigración, la represión, la creciente falta de places o recursos económicos pa estudiar… y ante ello, l’únicu camín ye la llucha por tresformar la realidá p’algamar un sistema nel que la clase trabayadora puea decidilo too, dende sigo mesma y pa sigo mesma.


No hay comentarios:

Publicar un comentario