jueves, 28 de mayo de 2015

Pasucais antirrepresivu contra la Llei Mordaza



ENTAMEN LES MOVILIZACIONES N’ASTURIES ESCONTRA LA LLEI MORDAZA
PASUCAIS POLA LLIBERTÁ Y ESCONTRA LA REPRESIÓN DE LA LLEI MORDAZA
SÁBADU 6 DE XUNU. 18:30 h. PARQUE XOVELLANOS. MIERES. ASTURIES.
CONVOQUEN: MIERES EN LLUCHA, ASTURIES EN PIE.

Dientro de les II Xornaes Mieres en Llucha, Asturies en Pie y l'Asamblea Popular Mieres en Llucha convoquen una movilización pola llibertá y escontra la represión, que va recorrer les cais de Mieres pa denunciar la desapaición de los derechos y llibertaes públiques que va apareyar la Llei Mordaza. Esta movilización va salir del Parque Xovellanos de Mieres, a les 18:30 h. del viniente sábadu 6 de xunu.

Les resultancies electorales son nidies: el PP yá nun tien llexitimidá pa siguir llexislando absolutamente nada. Munchu menos pa imponer una Llei Mordaza que, na práutica, desanicia la totalidá de los nuesos derechos y llibertaes públiques.

Les nueves mayoríes polítiques tienen, en cada Parllamentu y en cada Conceyu, una xera urxente que llevar a cabu: torgar que la Llei Mordaza entre en vigor.

Esta ye la primer movilización de la campaña entamada por d’Asturies en Pie, que yá convocó una xornada de llucha escontra la Llei Mordaza pal viniente 30 xunu, un día anantes de que dicha llei entre en vigor.

Por too ello, afalámosvos a que, dende agora mesmu, toes y toos entamemos a xunir fuerces en cada barriu, en cada pueblu y en cada ciudá d’Asturies, pa realizar toa triba movilizaciones y actos públicos de protesta, ellí onde síamos quien.

Queremos qu'esa xornada de llucha pola llibertá y contra la represión, confluya nuna gran manifestación, que vamos convocar el martes 30 xunu en Xixón, a les 19:30 h.

Amás d'ello, dende Asturies en Pie tamos en contautu con otres organizaciones (sindicatos, movimientos sociales, coleutivos antirrepresivos, etc.) de numberoses fasteres del Estáu español, pa intentar qu'esta xornada de llucha nun se quede solo n’Asturies, sinón que s'esparda a cuantos territorios del Estáu quieran participar.

¡POLA NUESA LLIBERTÁ!. ¡ESCONTRA LA REPRESIÓN!. ¡FUERA LA LLEI MORDAZA!.
(Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME, ESPACIU LA LLEGRA, DARRÉU, MIERES EN LLUCHA).

No hay comentarios:

Publicar un comentario