martes, 26 de mayo de 2015

I Marcha Moza en Defensa de la Ñatura







El prósimu 27 de xunu va tener llugar la primer Marcha Moza en Defensa la Ñatura, un eventu nel que se fadrá una travesía pelos montes d'Asturies col oxetivu y enfotu de crear conciencia mediuambiental dende un puntu de vista mozu. Nesta ocasión aniciamos esti eventu percorriendo el Camín Real de la Mesa onde pel trayeutu fadranse mini-talleres breves (10-15 minutos) sobre estremaos temes: mediu ambiente, soberanía, cultura y tradición, represión... too ello dende una perspeutiva moza.

Dende Darréu pondremos un autobús pa que'l viaxe seya más cómodu y podamos disfrutar toes más tovía del trayectu. El preciu del bus sedrá de 5 € por persona y los horarios de salida son los que vienen darréu:
- A les 8:00 en Xixón, na Gota Llechi.
- A les 8:30 n'Uviéu, onde'l llocal la CSI.
- A les 8:55 en La Felguera, na Estación d'Autobuses.
- A les 9:10 en Mieres, nel Antiguu Cuartel.

Dende Darréu animamos a tola mocedá a participar nesti alcuentru y facer que seya un día d'intercambiu d'idees, formación, folixa, aprendizaxe, conciencia y crítica. Porque creemos que la mocedá tien que ser el motor de cambiu y porque creemos que tenemos muncho que dicir pa tresformar Asturies y facer d'ella un sitiu de collores, un sitiu solidariu, con conciencia...porque queremos un pueblu llibre.

El 27 de xunu xubi a la Primer Marcha Moza en Defensa la Ñatura y faigamos camín xuntes por una Asturies onde'l mediu ambiente seya respetáu y cuidáu pa poder siguir deprendiendo toes d'él.

Contauta con nós y reserva la to plaza. Pues facelo vía email a la nuesa direición: darreu.moceda@gmail.com o nel teléfonu 696 106 907 (llamada de teléfonu o vía WhatsApp).

No hay comentarios:

Publicar un comentario