Por una Asturies llibre de fobies, ¡Puxa l’arguyu LGTB!

Llega un añu más el Día l’Arguyu LGTB, y dende Darréu camentamos perimportante siguir cola llucha escontra les discriminaciones que, pesie a los avances en dellos aspeutos llegales algamaos años atrás, sigue sufriendo’l coleutivu de llesbianes, gais, transexuales y bisexuales nel nuesu país, con especial enfotu dende la nuesa organización na vertiente de mocedá, sollertes tanto a les problemátiques y tabúes esistentes nel ámbitu educativu, como cualquier otru del ámbitu xoven.

Pa construyir una Asturies llibre, ye imprescindible una sociedá ensin discriminaciones pa llesbianes, gais, transexuales y bisexuales, siendo polo tanto irrenunciable l’avance nel algame plenu de los drechos del coleutivu LGTB, ya’l fin de les fobies, discriminaciones, ridiculizaciones, prexuicios heteronormativos, y otres problemátiques sociales derivaes d’ello.

Porque entá queda muncho que facer hasta algamar una Asturies llibre de fobies, la mocedá tien de siguir cola llucha contra los prexuicios espardíos dende medios de comunicación, Ilesia… o mesmamente contra les propies discriminaciones empobinaes dende l’ ámbitu gubernamental.