30 de xunu: xornada de llucha escontra la Llei Mordaza

Tamos asistiendo al funeral de la llibertá nel Estáu Español, si ye que dalgún día la hubo. Tolos díes somos testigos de montaxes policiales, cargues nes protestes pacífiques, atentaos escontra la llibertá d'espresión y hasta la intimidá de les persones; en definitiva, la criminalización de la protesta y la represión hacia los que lluchen. Hasta agora, los que texíen esta telaraña represiva facíenlo llibremente, pero a partir del 1 de xunetu nun va ser sólo llibremente, sinón que sedrá llegal.

La perconocía Llei Mordaza, aprobada pol gobiernu del PP debío a la so mayoría absoluta nel Parllamentu, entra en vigor en malpenes unes selmanes y vien pa quedase. Esta llei atenta escontra tou tipu de manifestación, concentración, reunión y, en definitiva, llibertá d'espresión, yá qu'hasta la crítica nes redes sociales va ser considerao delitu por desobediencia. Esta llei retrógrada quíta-y la careta al llobu, dexando n'evidencia l'autoritarismu y calter opresivu del gobiernu del Estáu Español, nel que primen los intereses de les élites económiques perriba de los de la clas obrera de los pueblos oprimíos, al quita-y a esta un de los pocos drechos que-y quedaben: el drechu a espresase.

Dende la Mocedá d'Izquierda Soberanista nun podemos más que combatir esta llei, entendiéndola como un insultu más a la clas trabayadora d'esti pueblu y a la mocedá combativo que se ñega a caminar al favor de la corriente. Por ello, llamamos a tola mocedá d'Asturies a participar na xornada de llucha entamada por Asturies en Pie el 30 de xunu, asina como na manifestación a les 19:30h, na Plaza L'Humedal de Xixón.

Porque namái los peces muertos naden al favor de la corriente: ¡Desobediencia!