Somos mocedá, somos clase trabayadora, somos muyeres, somos
asturianes y asturianos, y nun tenemos oportunidá de vivir dignamente
nel nuesu país. Ye la frase cola que podemos resumir les últimes décades
n’Asturies, con un procesu de desmantelamientu industrial que sigue, a
cuentagotes pero ensin fin, dexando a casi 100.000 persones en paru, la
mitá d’elles ensin nenguna prestación.
Pa la mocedá, paru y
emigración son la realidá mayoritaria, y énte ello la única alternativa
ye una emigración que fae que más de 10.000 moces y mozos marcharen
d’Asturies el pasáu añu, y un total de 40 persones al día garraren rumbu
a otros países pa consiguir un trabayu y una vida medianamente dignes.
Con esti panorama la mocedá nun puede permitise’l luxu de la resignación, sinon que l’únicu camín ye’l de siguir cola llucha por un futuru dignu nel nuesu país. Y eso nun pasa nin por la sumisión nacional, nin pola de xéneru, nin pola de clase, sinon pola rebeldía y el NON a les cadenes que mos imponen.
Defendemos por ello la
soberanía pal nuesu pueblu como única ferramienta que mos va a
garantizar la posibilidá de desarrollar, vertebrar, tresformar y
ameyorar el país en tolos sos aspeutos políticos, sociales, económicos,
etc, y esa soberanía pasa inevitablemente pola superación del
capitalismu y la construcción d’un sistema xustu ya igualitariu: el
socialismu.
Ye por ello que’l 1 de Mayu, amás d’una fecha
d’alcordanza y arguyu poles lluches obreres pasaes n’Asturies, tien de
ser una fecha de llucha, combatividá, y espardimientu d’estos finxos,
polo que llamamos a la mocedá a participar na manifestación entamada por
CSI, CGT y SUATEA (Plaza L’Humedal – Xixón - 12:30 hores) dientro’l
bloque #LluchandoPolaSoberanía, col sindicalismu combativu y cola iniciativa xunitaria pa defender otru camín p’Asturies
No hay comentarios:
Publicar un comentario