Esti vienres ye’l día de les lletres, y tanto la mocedá como’l
conxuntu del pueblu trabayador asturianu tenemos una cita imprescindible
cola nuesa dignidá y los nuesos derechos: la manifestación pola
oficialidá.
Son munchos años de marxinación, desigualdá y
represión, pero también de llucha y reivindicación pol únicu estatus
xurídicu que consideramos almisible y afayaízu pal asturianu y el
gallego-asturiano: la oficialidá.
Sicasí, nun vamos conformanos
con una mera igualdá formal, sinon qu’esto tien de venir a acompañao sí o
sí por un plan de normalización llingüística en toles estayes de la
sociedá, y n’especial nuna mocedá que, como rellevu xeneracional, ye la
que va garantizar la continuidá de los nuesos idiomas propios.
Nesi sen paeznos bien claro qu’esta falta de derechos nun ye casual: ye ún de los munchos aspeutos nos que l’Estáu español mos intenta aculturizar y uniformizar, o como dixo aquel ministru: españolizanos. Poro, pa combatir estes problemátiques culturales, igual que pa combatir el paru, la precariedá, la emigración, la desigualdá de xéneru… apostamos pola soberanía pal nuesu país, l’únicu marcu col que vamos ser quien a decidilo too.
En consecuencia, llamamos a la mocedá a participar
na manifestación con empiezu’l vienres 6 de mayu a les 19:30 na Estación
de Renfe d’Uviéu, y más en concretu nel bloque #LluchandoPolaSoberanía, qu’una vegada más va tar glayando que valió de dexanos pisar, valió de centralismu y amarraces.
OFICIALIDÁ YÁ
OFICIALIDÁ XA
AXÚNTATE AL BLOQUE SOBERANISTA
OFICIALIDÁ XA
AXÚNTATE AL BLOQUE SOBERANISTA
No hay comentarios:
Publicar un comentario