Esti Primeru de Mayu la manifestación entamada por CSI, CGT y SUATEA percorrió les cais de Xixón, col llema "Nin crisis, nin guerres, nin mordaces: ¡solidaridá!". Na mesma, axuntáronse un añu más coleutivos sindicales, de mocedá, internacionalistes... col enfotu de reivindicanos como clase trabayadora, y de siguir denunciando les munches problemátiques que sufrimos como muyeres, como asturianes, y como obreres.
Foi esa la llinia de les intervenciones polítiques de distintes organizaciones y conflictos llaborales, qu'amosaron les sos problemátiques y l'apueste decidíu pola movilización, pola dignidá y la llucha, pa valtiar el futuru de precariedá, paru y emigración que mos imponen. Como diz el glayíu, "Asturies sálvase lluchando".
Dende Darréu - Mocedá d'Izquierda Soberanista tuviemos participando nesta movilización dientro'l bloque #LluchandoPolaSoberanía, que por tercer añu consecutivu axuntó sensibilidaes diverses del soberanismu asturianu, baxo un llema común, na llinia de reivindicación nacional, de clase, y de xéneru, énte una situación d'emerxencia social carecía pola clase trabayadora del nuesu país.
Siguimos trabayando por treslladar un añu más la necesidá de que la mocedá s'organice, como ún de los coleutivos más afeutaos pola situación d'Asturies, la que namái puede iguase con llucha y el desendolcu y fortalecimientu d'un movimientu que dende'l marcu nacional asturianu, faiga un apueste decidíu pola superación del capitalismu y toles sos llaceries.
LA MOCEDÁ POL SOCIALISMU
PUXA LA LLUCHA DE LA CLASE OBRERA
XÚNITE A LA MOCEDÁ REBELDE
No hay comentarios:
Publicar un comentario