lunes, 30 de enero de 2017

Crónica de la II Marcha Moza en Defensa de la Ñatura



Esti domingu 29 de Xineru tuvo llugar la II Marcha Moza en Defensa de la Ñatura, entamada por Darréu na Ruta l'Alba. Na mesma participaron alrodiu de 40 persones, baxo unes premises bien clares ya importantes pal presente y futuru del nuesu país: la denuncia de les agresiones mediuambientales que venimos careciendo, asina como la necesidá de construyir les alternatives a esta realidá. 

Amás de ser una xornada deportiva, llúdica y de xermandía, hebo espaciu pa dellos talleres nos qu'afondar y tratar más en comuña les cuestiones yá citaes. Asina, temes como'l fracking, l'espoliu enerxéticu que carecemos a base d'una producción percontaminante en centrales térmiques pa la esportación de lletricidá, la llucha escontra les diverses llinies d'alta tensión, o les problemátiques carecíes na zona de Redes (Banzáu de Caliao, tresporte, ganadería...) foron trataes de primera mano por persones implicaes neses lluches, amás del posterior alderique ente toes y toos.



Con too ello, la xornada remató de vuelta a Soto d'Agues, siendo l'enfotu de la Mocedá d'Izquierda Soberanista siguir tratando estes cuestiones mediuambientales, conscientes de la importancia que tienen tanto pa la nuesa salú, como pal caltenimientu del nuesu patrimoniu natural, amás de pa poder siguir construyendo un discursu soberanista p'Asturies con proyeutu pa toles estayes. 

¡PUXA LA LLUCHA DE LA MOCEDÁ!
¡EL NUESU MEDIUAMBIENTE NUN SE VENDE!

No hay comentarios:

Publicar un comentario